ಮಿದುಳ ಮಡಿ (Brain Wash)

ರೇಶಿಮೆಯ ಮಡಿಯುಟ್ಟ ಮುಗ್ಧ ಮುದ್ರಾಧಾರಿಯು

ಗೋಡೆಯಾಚೆಯ ಗೆಳೆಯನ ಕೈಯ ಪಾಪ್ಕಾರ್ನಿಗೆ

ಬಾಯೊಡ್ಡಿದುದ ಕಂಡು, ಈರ್ವರು ಬೆಳೆದಂತೆ

ಗೋಡೆಯೂ ಬೆಳೆವುದನೂಹಿಸಿದ ಓಮಾರ

ಹೊಸ ಅಫೀಮು

ಧರ್ಮ ಮಂದಿಗಫೀಮೆಂದ ಮಾರ್ಕ್ಸ್.

ಅದು ದುರ್ಬಲವಾದೊಡೆ ಕೈಗಾವಲಿಗಿರಲೆಂದು

ಫುಟ್ಬಾಲ್, ಸಿನಿಮ, ಟೀವಿ, ಐಪಿಎಲ್‍ಗಳನು

ಹಣವಂತರು ಸೃಷ್ಟಿಸಿರಬೇಕೆಂದ ಓಮಾರ

ನಾನು - ಜೀನು

"ನಾನು" ಜೀನುಗಳ ಉಳಿವಿಗೆಂದಾದ

ಅನೇಕ ಚೇಷ್ಟೆಗಳಲ್ಲೊಂದರ ಅನಿರೀಕ್ಷಿತ ಪರಿಣಾಮ ಎಂದು,

ನಾ ಬಂದೆನೆಲ್ಲಿಂದ, ಹೋಗುವೆನೆಲ್ಲೆಗೆ? ಎಂಬ

ಘನಪ್ರಶ್ನೆಯ ಬಲೂನಿಗೆ ಸೂಜಿ ಚುಚ್ಚಿದ, ಕುಹಕಿ ಓಮಾರ