ಕ್ರೌರ್ಯ

                           

                          ಮೂರುರಸ್ತೆಗಳು ಸೇರುವೆಡೆ 
                          ಮೂಢನಂಬಿಕೆಯಿಂದೊಡೆದ
                          ಮೊಟ್ಟೆಗಳು  ಉಣಲಿರದೆಷ್ಟುಹಸುಳೆ
                          ಜೀವಗಳನ್ನುಳಿಸೀತೆಂದು ನೊಂದನೋಮಾರ

ಪೊರೆಯ ತೊರೆ!

ಬೇಸಿಗೆಯ ಬೇಗೆಯಲಿ ಮುಂಗಾರಿನ ಸೋನೆಯೇ ಸೈ ಎಂದಂತೆ,  

ಬೇಲಿಯಾಚೆ ಬೆಳೆದ ಹುಲ್ಲೆಷ್ಟು ಹಸಿರು ಎಂದು ಹಾತೊರೆದಂತೆ,

ಜ್ಞಾನ, ವಿಜ್ಞಾನ, ತಂತ್ರಜ್ಞಾನಗಳೀಯುಗದ ಸೊಬಗು ಸೋಜಿಗಗಳ ಬದಿಗೊತ್ತಿ,

ಅಳಿದ, ಹಿಂದುಳಿದ ಹಿಂದಿನದಕ್ಕೆ ಹಾತೊರೆಯದಿರೆಂದ ಓಮಾರ.

ಮುದ

ಛಳಿಗಾಲದ ಬರಡು ಹವೆಯಿಂದ ಬೇಸತ್ತ ಮೈಮನಸಿಗೆ

ಅನಿರೀಕ್ಷಿತ ಮಳೆಯು ತಂದಿತ್ತು, ಮುದ ತರುವ, ನವಿರು

ರೇಶೀಮೆಯಂದದ, ತೇವಭರಿತ, ಬದುಕು ಬಯಸುವ, ಛಳಿಯ

ತೆರೆದ ತೋಳುಗಳಿಂ ಸ್ವಾಗತಿಸುವಂದದ ಕುಳಿರ್ಗಾಳಿ!