ಶಾಪ

ಅರ್ಥವಾಗದಿದ್ದರೂ ಹಳೆಗನ್ನಡವನೋದಿ ಆನಂದಿಸಿದ ತಪ್ಪಿಗೆ

ಕೈಲಾದಮಟ್ಟಿಗೆ ಕನ್ನಡವ ಓದಿ ಬರೆದ ತಪ್ಪಿಗೆ

ಬಲವಂತ ಮಾಘಸ್ನಾನವೆಂಬಂತೆ ದಿನವೂ ಬಸ್ಸಿನಲ್ಲಿ ಕನ್ನಡ ಸಿನಿಮಾ ಸಂಗೀತವ ಕೇಳುವಂತೆ ಶಾಪ ಕೊಟ್ಟನೇನೋ ಆ ಕ್ರೂರಿ! 

ಕಾಲದುಂಗುರ

ಸಣ್ಣ ಟಣ್‍ಕಾರ,

ಕ್ಷಣಿಕ ಹೊಳಪಿನ

ಹೊರತು

ಜಾರಿತ್ತು

ನನ್ನುಂಗುರ

ನನಗರಿಯದೆಂಬಂತೆ

ತೇಜೋಮಯಿ

 ಶಕುಂತಲೆಯು

ಒನಪಿನಿಂದ

ಬೆಳ್ಳಿ ಕಿರುದೆರೆಗೆ

ಕೈಚಾಚಿದ ಚಿತ್ರವು

ಚಿಮ್ಮಿತ್ತು ಮನದಲ್ಲಿ

ತವರಿನ ತವಕದಲಿ

ಲೀನಳಾಗಿದ್ದಳೋ,

ಕೆಳಗಿದ್ದ

ಚಂಚಲ ಕನ್ನಡಿಯು ಬಿಂಬಿಸಿದ

ಸುಭದ್ರ ಭವಿಷ್ಯದಲಿ

ತಲ್ಲೀನಳಾಗಿದ್ದಳೋ?

ಅಭಯದುಂಗುರ

ಕಳಚಿ

ಆರ್ತ ಪ್ರಾರ್ಥನೆಗಿಂತ

ಆಳಕ್ಕೆ ಮುಳುಗಿತ್ತು.

ಇಚ್ಛಾಸ್ಮರಣಿ

ಬಲಶಾಲಿಗೆ

ಆಕರ್ಷಿತ ’ಹೆಣ್ಣು-ಮಗು’ವಿನ

ದುಬಾರಿ ತಪ್ಪು ಅದು.

ಭಂಗಾರ ಗರ್ಭದ

ಪಾಪದ ಮೀನು

ತೇಲಿ ಬಂದು,

ಹಸಿದ ಕೈಗಳಿಂದ

ಸಿಗಿದು ಸೀಳಾಗಿರದಿದ್ದರೆ

ಅದೆಂತಃ ಅಂತ

ಕಾದಿತ್ತೋ ಆಕೆಗೆ?

ಆ ಶಪಿತ ರಾಜನ

ಗೋಜೇ ಇಲ್ಲದಿರೆ

ಅವಳ ಬಾಳು

ಹಸನಾಗಿದ್ದಿದ್ದೀತೆ,

ತನ್ನ ತಪ್ಪಿಗೆ

ಹಳಿಯುವ ತವರಿಗೆ

ಹಿಂಬಂದರೂ ಸೈ?

ಕಣ್ಣಿಗೆ ಎಟಕುವುದೆಲ್ಲವ

ಗೆದ್ದು ತನ್ನದೆಂದ

ಅವಳ ಕೋಲ್ಮಿಂಚು ಮಗನ

ನಾಡಾದ ಈ

’ಭಾರತ’ದ

ಪ್ರಜೆಗಳಾಗಿರುತ್ತಿರಲಿಲ್ಲವೇನೊ

ನಾವು ಆಗ.

ಬಲಿಷ್ಠ ಅತಿಕ್ರಮಿಗಳ

ಕತ್ತಿಗಳಡಿ

ಕುಗ್ಗುತ್ತಿರಲಿಲ್ಲವೇನೊ

ನಾವಾಗ;

ನಿಜಗಳನು

ಮನಸ್ಸೇಚ್ಛೆ ನಿರ್ಧರಿಸಿಬಿಡುವ

ಶಕ್ತಿವಂತರು ನಿರ್ಮಿಸಿದ

ಚರಿತ್ರೆಗಳನ್ನು

ಧಿಕ್ಕರಿಸಿಬಿಡುತ್ತಿದ್ದೆವಾನೋ...

If you cannot read the above, 

please click on the pictures below to see larger.

…… ರೆ

ಸುತ್ತೆಲ್ಲ ಮಂದಿ ಮತಿಹೀನರಾಗುತ್ತ ಅದರ ತಪ್ಪ

ನಿನ್ನಮೇಲೆ ಹೇರಿದೊಡೆಯೂ, ಮತಿ ನಿನ್ನ ವಶದಲ್ಲಿರೆ;

ಜಗದ ಅವಿಶ್ವಾಸದೆದುರು ನೀ ವಿಶ್ವಾಸಹೀನನಾಗದಿರೆ,

ಆ ಅವಿಶ್ವಾಸಕ್ಕೆ ತಾಳ್ಮೆದೋರಬಲ್ಲೆಯಾದರೆ;

ಕಾಯಬಲ್ಲವನಾಗಿ, ಕಾದು ದಣಿಯಲೊಲ್ಲೆಯಾದರೆ,

ನಿನ್ನ ಬಗ್ಗೆ ಸುಳ್ಳುಗಳ ಹೇಳಿದರೂ ಸುಳ್ಳಾಡವೊಲ್ಲೆಯಾದರೆ,

ದ್ವೇಶಿಸಲ್ಪಟ್ಟರೂ ದ್ವೇಶಕ್ಕೆ ನೀ ಎಡೆಗೊಡದಿದ್ದರೆ,

ಇಷ್ಟಾಗಿ, ನೀ ಮೆರೆಯದಿರೆ, ಬಲ್ಲವನಂತೆ ಮಾತನಾಡದಿರೆ;

ಕನಸ ಕಾಣಬಲ್ಲವನಾಗಿಯೂ ಕನಸು ನಿನ್ನ ಯಜಮಾನನಾಗದಿರೆ;

ಆಲೋಚನಾಪರನಾಗಿ, ಆಲೋಚನೆಗಳೇ ನಿನ್ನ ಗುರಿಯಾಗದಿರೆ;

ವಿಜಯ ವಿಪತ್ತುಗಳನ್ನು ಎದುರಿಸಿ

ಅವೆರಡೂ ವಂಚಕರು ಒಬ್ಬನೇ ಎಂಬಂತೆ ನೀ ಕಂಡರೆ;

ನೀನುಲಿದ ಸತ್ಯಗಳ ತಿರುಚಿ, ನೀಚರು

ಮರುಳರಿಗೆ ಉರುಳುಮಾಡುವುದ ನೀ ಸಹಿಸಬಲ್ಲೆಯಾದರೆ,

ನೀ ಜೀವ ತೇಯ್ದು ಕಟ್ಟಿದ್ದು ಮುರಿದುಬಿದ್ದುದ ನೋಡಿ

ಮತ್ತೆ ಕಟ್ಟಲು ಸವಕಲು ಸಾಧನಗಳನೆತ್ತ ಬಲ್ಲೆಯಾದರೆ;

ನೀನು ಗೆದ್ದುದನೆಲ್ಲ ಗುಡ್ಡೆಹಾಕಿ

ದಾಳದ ಕುಣಿತಕ್ಕೆ ಪಣವೊಡ್ಡಿ,

ಸೋತು, ಮತ್ತೆ ಮೂಲದಿಂದ ಪ್ರಾರಂಭಿಸಿ

ನಿನ್ನ ಸೋಲಿನ ಬಗ್ಗೆ ಸೊಲ್ಲೆತ್ತಲೊಲ್ಲೆಯಾದರೆ;

ನಿನ್ನೆದೆ ನರ ನಾಡಿಗಳಳಿದ ಮೇಲೂ ನಿನ್ನ

ಕರ್ತವ್ಯಗಳಿಗವನ್ನು ಒತ್ತಾಯಿಸಿ

ಅವಕೆ “ತಡೆ” ಎಂದಾಜ್ಞಾಪಿಸುವ ಸಂಕಲ್ಪವಲ್ಲದೆ

ನಿನ್ನಲ್ಲೇನೂ ಉಳಿದಿಲ್ಲದಾಗ್ಯೂ ಕೈಬಿಡಲಾರೆಯಾದರೆ;

ಮಂದಿಯೊಡನೆ ಮಾತಾಡಿಯೂ ನಿನ್ನ ಸದ್ಗುಣವ ಕಾಪಾಡಬಲ್ಲೆಯಾದರೆ,

ರಾಜರೊಡನಾಟದಲ್ಲೂ ಸಾಮಾನ್ಯರ ಸಂಪರ್ಕವ ಬಿಡಲೊಲ್ಲೆಯಾದರೆ;

ಶತ್ರುವೂ ಪ್ರಿಯಮಿತ್ರನೂ ನಿನ್ನ ನೋಯಿಸಲಾರರಾದರೆ;

ಪ್ರತಿಯೋರ್ವರೂ ಗಣ್ಯರಾಗಿ, ಆದರೆ ಒಬ್ಬರೂ ಬಹಳವಾಗಲ್ಲದಿದ್ದರೆ,

ನಿಷ್ಕರುಣಿ ನಿಮಿಷದಲಿ ಅರವತ್ತು

ಕ್ಷಣಗಳ ಓಟವ ತುಂಬಬಲ್ಲೆಯಾದರೆ -

ನಿನ್ನದೀ ಭುವಿ ಮತ್ತದರೊಳಗಣದೆಲ್ಲ,

ಅದ ಮೀರಿ, ಮಗು, ನೀ ಮನುಷ್ಯನಾಗುವೆ ದಿಟ!

ಇದು ರಡ್ಯಾರ್ಡ್ ಕಿಪ್ಲಿಂಗ್ ಅವರ If ಎಂಬ ಪದ್ಯದ ಭಾಷಾಂತರ.

This is the Kannada translation of Rudyard Kipling's poem "If"

If you cannot read the text in Kannada above, please click on the image below to get an enlarged image,

ಹೂಗುಚ್ಛ

        






ಬಿಡಿ ಹೂಗುಚ್ಛದ ಸೋಗ

ಒಲ್ಲದವರಿಗೂ ಒಲ್ಲದ ಹೂಗುಚ್ಛವ ಕೊಟ್ಟು ಹಲ್ಕಿರಿಯಲು

ಉಪಯೋಗಿಸುತ್ತಾರ, ದುರ್ಲಭ ಜಮೀನ ಹೂ ಬೆಳೆಯಲು.

ಕಾಳು ಬಡವರ ಕೈಗೆಟುಕದಂತಾಗಿಸುತ್ತಾರ 

ಸೋಗಿನ ಸಂಸ್ಕೃತಿಯ ಸಿರಿವಂತರು ಎಂದ ಓಮಾರ.

Click on the image below to see a larger image

ಪ್ರಭ ನಾರಾಯಣನ್ ಅವರ ಚಿತ್ರಕಲಾ ಪ್ರದರ್ಶನ

ಪೆನ್ಸಿಲ್ ಜಾಮ್ ಎಂಬ ಚಿತ್ರಕಾರರ ಒಕ್ಕೂಟ ಒಂದರ ಸದಸ್ಯ ನಾನು. ಅದರ ಇನ್ನೊಬ್ಬ ಸದಸ್ಯೆ ಪ್ರಭ ನಾರಾಯಣನ್ ಅವರ ಚಿತ್ರಕಲೆಯ ಪ್ರದರ್ಶನ ನಾಳೆಯಿಂದ ಚಿತ್ರಕಲಾ ಪರಿಷತ್ತಿನಲ್ಲಿ ಆರಂಭವಾಗಲಿದೆ. ಕರೆಯೋಲೆ ಇಲ್ಲಿದೆ.

ನಾನು ಅವರ ಕಲೆಯ ಅಭಿಮಾನಿ. ನೀವು ಅದನ್ನು ನೋಡಿದರೆ ನೀವೂ ಅದರ ಅಭಿಮಾನಿಯಗುತ್ತೀರಾ ಎಂಬ ಭರವಸೆ ನನಗಿದೆ. ಖಂಡಿತ ಬನ್ನಿ.

ಚಿಂತಿಸದಿರು ರೋಹಿಂಟನ್

ಪುಸ್ತಕವ ಸುಟ್ಟರೆ ಏರುವುದು ಬರಿಯ ಹೊಗೆಯಲ್ಲ,

ಅದರೊಳಗಣ ಸತ್ಯವದು, ಹರಡುವುದು ಜಗದ ಉದ್ದಗಲ,

ಬೀಳುವುದು ಅದರ ಬೂದಿಯಲ್ಲ, ಸುಟ್ಟ ಸಮಾಜದ

ಕರಕಲು ಭಸ್ಮವದು ಎಂದ ಓಮಾರ

ಮೈಮಾಟ

ಕ್ವಿಂಟಾಲ್ ತೂಕದ ಮೂಟೆಗಳ ಹೊತ್ತು ಮಂಡಿಪೇಟೆಯಲ್ಲಿ

ಇಳಿಜಾರಿನ ಮೇಲೆ ಏರಿಳಿಯುವ ಕಷ್ಟಜೀವಿಯ ಮೈಮಾಟವು

ಜಿಮ್‍ನಲ್ಲಿ ಯಂತ್ರಗಳ ಮೇಲೆ ವೃಥಾ ಕಸರತ್ತು ಮಾಡಿ ಕೆತ್ತಿದ

ಸುಖಜೀವಿಯ ಮೈಮಾಟಕ್ಕೆ ಮಿಗಿಲಾಗಿ ಕಂಡಿತು ಓಮಾರನಿಗೆ

ಆರಾಧನೆ

ದೇವವಿದ್ದು, ಈ ವಿಶ್ವವದರ ಸೃಷ್ಟಿಯೇ ಆದೊಡೆ

ಆ ದೇವವನಾರಾಧಿಸಲು ಬಾಲಿಶ ಕಟ್ಟುಕತೆಗಳ ಬದಲು

ಜೀವ- ಭೌತ- ಶಾಸ್ತ್ರಗಳನೋದಿ

ಅಚ್ಚರಿಗೊಳ್ಳುವುದೆ ಮೇಲೆನಿಸಿತು ಓಮಾರನಿಗೆ.

ನಿದ್ರೆ

ಜೀವನ ಕಲಿಸಿದ ಪಾಠಗಳ ನೆನಪಿನಲ್ಲುಳಿಸಿ
ಕೋಪ, ದ್ವೇಷ, ದುಃಖ, ನೋವುಗಳ ಅಳಿಸಿ
ಹೊಸ ದಿನದ ಹೊಸ ಹಾಳೆಯ ಬಿಡಿಸಿ
ಏಳೆಲೆಂದೇ ನಿದ್ರೆಯೆ? ಕೇಳಿದನಜ್ಞಾನಿ ಓಮಾರ

ಮಕ್ಕಳು

ನಿನ್ನ ಮಕ್ಕಳು ನಿನ್ನವಲ್ಲ
ಜೀವಕ್ಕಿರುವ ಜೀವದಾಸೆಯ ಮಕ್ಕಳವು
ನಿನ್ನೊಳಗಿಂದ ಬರುವವಷ್ಟೆ ನಿನ್ನವಲ್ಲ
ನಿನ್ನೊಡನಿದ್ದೂ ನಿನ್ನವಲ್ಲವವು
ನಿನ್ನ ಪ್ರೀತಿಯನಷ್ಟೆ ಅವಕ್ಕೆ ಕೊಡಲುಂಟಷ್ಟೆ, ನಿನ್ನ ಚಿಂತನೆಗಳನಲ್ಲ
ಅವಕ್ಕುಂಟು ಸ್ವಂತ ಚಿಂತನೆ
ಅವರ ತನುವಿಗಷ್ಟೆ ನಿನ್ನ ಮನೆ, ಮನಕಲ್ಲ
ನೀ ಕನಸಲೂ ಹೊಗಲಾರದ ನಾಳೆಯೇ ಅವರ ಮನೆ
ಅವರಂತಾಗಲು ಹೆಣಗು, ನಿನ್ನಂತೆ ಅವರನಾಗಿಸಲಲ್ಲ
ಹಿನ್ನಡಿಯದು ಜೀವ, ತೊಳಲದು ನೆನ್ನೆಯಲಿ
ಜೀವಂತ ಬಾಣಗಳವೊಲು ಮಕ್ಕಳ ಚಿಮ್ಮಿಸುವ ಬಿಲ್ಲು ನೀನು
ಬಿಲ್ಗಾರ ಕಾಣುವನು ಅನಂತದ ಹಾದಿಯ ಮೇಲಿನ ಗುರಿಯ
ಬಗ್ಗಿಸುವನು ನಿನ್ನವನ ಬಲದಿಂದೆ ಅವನ ಬಾಣವತಿದೂರ ತ್ವರದಿ ಸಾಗಲೆಂ
ಬಾಗು ಸಂತಸದಿ ಬಿಲ್ಗಾರನ ಕೈಯೊಳು
ಚಿಮ್ಮುವ ಬಾಣವಷ್ಟೇ ಪ್ರಿಯವಲ್ಲವವಗೆ
ಪ್ರೀತಿಸುವನವನು ಸ್ಥಿರವಿರುವ ಬಿಲ್ಲಕೂಡ





ಖಲೀಲ್ ಗಿಬ್ರಾನನ "On Children" ಎಂಬ ಪದ್ಯದ ಕನ್ನಡ ರೂಪ
ಅ ಪದ್ಯವನ್ನು ಯಾರಾದರೂ ಕನ್ನಡಕ್ಕೆ ಭಾಶಾಂತರಿಸಿದ್ದಾರೋ ಇಲ್ಲವೂ ನನಗೆ ಗೊತ್ತಿಲ್ಲ. ಅಂತಹ ಭಾಷಾಂತರ ಇದ್ದಲ್ಲಿ, ನನ್ನ ಪ್ರಯತ್ನಕ್ಕೂ ಅದಕ್ಕೂ ಹೋಲಿಕೆ ಇದ್ದಲ್ಲಿ ಅದು ಖಂಡಿತ ಆಕಸ್ಮಿಕ. ನಿಮಗೆ ಗೊತ್ತಿದ್ದಲ್ಲಿ ದಯವಿಟ್ಟು ನನಗೆ ತಿಳಿಸಿ.


(This is a translation of Khalil (Kahlil) Gibran's poem "On Children". If there is any similarity to any other translation of this poem, it is completely accidental. Do please let me know if you know of any other translation.)